Blomkålcurry med kokosmjølk

Blomkålcurry med kokosmjølk

Hei! Sidan sist har eg prøvd ut seks nye rettar med blomkål. De som var raskaste og enklaste å laga, var attpåtil ein av dei eg likte best. Passar veldig godt på regnvåte dagar.

Eg har alltid eit godt utval med krydder og øskjer/boksar med kikerter og andre bønner og linser i skapet, pluss kokosmjølk og hermetiske tomatar. Og kjøleskapet vårt er aldri tomt for sitron. Kvitløk og løk frå hagen ligg på tørk i kvar si korg. Så då hadde eg det me trong.

Dette brukte eg:

  • 2-3 ts olje til steiking, eg brukte kokosolje.
  • 1 medium stort blomkål
  • 2 små, gule løk
  • 1/2 kvitløk
  • 2 ts gurkemeiepulver
  • 1-2 ts paprikapulver
  • 2 ss garam masala (krydderblanding)
  • 1 øskje hakka tomatar (400 gram)
  • 1 øskje kokte kikerter (400 gram)
  • 1 kokosmjølk. 330 ml var det i ein liten kartong økologisk, men det hadde nok gått bra med ein boks på 400 ml eller ei lita øskje på 250 ml også.
  • 1/2 sitron, evt. lime
  • 1 bunt koriander, evt. bladpersille
  • Salt, peppar

Slik gjer eg det:

  1. Vask blomkålet og del det i små bukettar. Du kan også bruka mykje av stilkane, skjer dei i mindre bitar.
  2. Skrell og hakk løk og kvitløk og røresteik i olje smaman med garam masala og gurkemeie på medium varme, skal ikkje bli brun.
  3. Ha oppi blomkål og røresteik vidare nokre minuttar.
  4. Skyl av kikertene i eit dørslag, ha i saman med tomatar, kokoksmjølk og paprikapulver.
  5. La det putra til blomkålen blir mørt og sausen tjuknar litt.
  6. Smak til med salt og peppar.
  7. Skvis over sitron og dryss med koriander, evt. bladpersille.

Nok til 4 personar, i alle fall om du serverer ris til og gjerne nokre lettwokka grønkål/svartkål/bladbeteblad.

Fleire oppskrifter kjem på bloggen etter kvart!

Hagetips:

Når du dyrkar blomkål, er dei fyrst dekka av dei store grøne blada. Etter kvart som sjølve blomkålhovudet blir stort, blir blada ståande rett opp. For å unngå misfarging av den kvite blomkålen, brett eit blad eller to over.

Og: Ikkje så deileg med sneglar i blomkålen, ta deg ein sneglerunde kvar kveld. I alle fall når det regnar!

 



Legg att eit svar

Epostadressa di blir ikkje synleg. Påkravde felt er merka *


%d bloggers like this: