Den store kalkunmiddagen

Den  store  kalkunmiddagen

Skal du ha kalkun på nyttårsafta? Det du serverer til, er minst like viktig som kalkunen, synes me her i huset. Ristuffing med fiken og eple, omsbakte rosmarinpoteter, grønsaksform med rosenkål&pastinakk, omnsbakt rødløk, heimelaga rødkål, Waldorfsalat, tranebærsaus, soppsaus og sjy-fløte-sherrysaus er vanlegvis fast tilbehør her i huset.

Me har kalkun som fast tradisjon på 2. juledag. I år hadde me også omnsbakt graskar. Waldorfen blei bytta ut med ein friskare og meir fargeglad salat.

I mange år var det heil kalkun som gjaldt, men eg er glad me gjekk over til store kalkunfiletar. Enklare å laga, lettare å skjera opp, mindre «graps», null svinn og viktigaste av alt: Det blei plass til andre ting enn ein diger fugl i steikeomnen.  Den største utfordringa med kalkunmiddagen er nemleg å få alt ferdig og varmt samstundes når ein bare har ein komfyr.. Her får du tips om det pluss oppskrifter.

Stuffingen lagar eg nå i ei form i staden for å stappa han inn i ein oppspretta kalkun. Med sjøldyrka «Summerred»-epler og salvie. Eplene har halde seg heilt til nå i grønsaksskuffene nederst i kjøleskapet.

RISSTUFFING MED EPLE,  FIKEN og SALVIE

Ingrediensar:

  • 2,5 dl ukokt fullkornris og snautt 5 dl vatn
  • 1 ss rapsolje
  • 1 gul løk
  • 4 selleristilkar
  • 4 ss tørka salvie
  • 2 ss finhakka bladpersille
  • peppar og bittelitt salt
  • 5 epler
  • 1 dl appelsinjuice
  • 9 fiken
  • 5 ss graskarkjerner
  • 2 dl eplejuice

Framgangsmåte:

  1. Kok risen bittelitt kortare tid enn du pleier og med bittelitt mindre vatn (viktig at han ikkje blir for mjuk og slett ikkje «grøtete»).
  2. Finhakk løk og surr på panne til han blir mjuk og gyllen, men ikkje brun.
  3. Finhakk selleristilkar og la dei surra med litt på slutten.
  4. Hakk persille.
  5. Bland ris, løk, selleristang og urter i ei skål.
  6. Skjer opp epler og fiken i bitar (eg skreller ikkje eplene).
  7. Bland alt.  I staden for graskarkjerner kan du bruka valnøttar om du ikkje har ein nøtteallergikar i familien.
  8. Ha alt over i  ei eldfast form som du har smurd med rapsolje eller smør.
  9. Dekk med aluminumsfolie.
  10. La stå i steikeomnen på 180 grader i cirka 30 minutt, ta av folien dei siste ti minutta.

KALKUNEN 

Eg steiker kalkunfiletane (to filetar på rundt 1,7 kilo kvar vart meir enn nok til åtte vaksne og sju barn) og potetene fyrst.

Hugs å ta ut kalkunen frå kjøleskapet kvelden før slik at kjøtet held romtemperatur. Gni filetane inn med salt og peppar og litt paprikapulver. Brun i panna. Bruk smør. Ha bruna filetar over i eldfast form. Ha eit-par deciliter appelsinjuice i steikepanna og hell sjyen over filetane. Skjer to rødløk i båtar og legg under filetane.

Steik på rundt 125 grader i rundt to timar. (Bruk gjerne steiketermometer).

La kalkunen «kvila» før du skjer han opp.

Urtepoteter, risstuffing og rosenkål&pastinakk ventar på ledig plass i steikeomnen. Slengde på nokre ekstra salvieblad på stuffingen. Sjå på graskaret, er det ikkje flott?

LOGISTIKK

Mens kalkunen kviler (hald både kalkunen og potetene varme med å leggja over aluminiumsfolie), puttar eg fyrst stuffingen og så formene med grønsakene inn i omnen.

Så steiker dei ferdig mens eg lagar sjysausen og tranebærsausen og dotter mi gjer ferdig soppsausen.

URTEPOTETER

Eg brukar mandelpoteter. Vask dei og skjer dei i båtar. Ha i eldfast form, strø over peppar, salt, rosmarin og hell over nokre klunkar god olivenolje. I staden for rosmarin kan du også bruka timian eller salvie.

Rosenkål er ein super vintergrønsak. (Foto: Jan Inge Haga, februar 2017)

GRØNSAKSFORM

Vask og skrell. Skjer rosenkål i to. Skjer pastinakken i små bitar. Ha i eldfast form, krydra med timian, salt, peppar og ha på litt olivenolje. Også godt med aromasopp i denne forma, men me brukte all soppen i  soppsausen.

I staden for/eller i tillegg til pastinakk, kan du også bruka sellerirot.

I fjor hadde eg rosenkål og pastinakk i kjøkkenhagen, dessverre ikkje i år. Fantastiske planter, klarer seg i fleire kuldegrader (minus ti i mars i fjor). 

Eit normalt menneske hadde her sjølvsagt teke bilete av kalkunen (i omnen), mens eg var sjølvsagt mest oppteken av alle graskarkjernene… Nok frø til neste år, he,he.

KRYDRA GRASKAR

Eg brukte «Marina di Chioggia», ein smakfull sort. Du treng ein skarp kniv og litt krefter til å skjera det opp! Del det fyrst i to, så i fire. «Grav ut» kjernene og den trevlete «innmaten» i midten. Ta vare på kjernene! Vask dei, tørk dei og så til våren! (Her kan du lesa om sortane me hadde i Leikeplasshagen i  2018).

Herleg oransje farge på graskarkjøtet!

Skjer det i bitar, ha i form med olivenolje eller meierismør. Krydra med ingefær, kanel, allehånde, muskattnøtt, koriander. Dryss på litt av kvart, sånn cirka 2 ts ingefær og kanel og 1 ts av koriander, muskattnøtt,  allehånde. Pluss litt salt og peppar.

Kjempegodt! Blir det noko til overs, kan du laga suppe av det neste dag.

Dette er den beste heimelaga rødkålen eg har smaka til nå: MONAS RØDKÅL

God saus må til: TO SMAKFULLE, FEITTFRIE SAUSAR TIL KALKUN

OPPSKRIFT på min nye FAVORITTSALAT til kalkun får her: RUBINSALAT



Legg att eit svar

Epostadressa di blir ikkje synleg. Påkravde felt er merka *


%d bloggers like this: