Slik får du 2 avlingar i ein dobbel pallekarm pluss 4 ekstra trillebårlass jord

Pallekarmane mine produserer ikkje bare mat, dei produserer også supergod jord. Jepp! Sjå her, så skal eg visa deg trinn for trinn med fotos.

Men fyrst må me rykka tilbake til august i fjor:

Utgangspunkt: Ein dobbel pallekarm.

I august 2017 fylte eg denne meir enn halvveges opp (1,5 pallekarm) med planteavfall frå hagen pluss litt tang og tare, hestemøkk og grov kompost. Så toppa eg med eit trillebårlass jord frå eit kjøkkenhagebed. I fjor haust dyrka eg kinakål og vårløk i karmen. Etter at kinakålen blei hausta, toppa eg med lauv.

Kinakål og grønkål fotografert i oktober 2017.

I starten av april 2018, var innhalde sunke ein del saman, for plantematerialet var blitt til god kompostjord. Eg tok bort sjølve karmane, der låg ein stor haug god jord. Eg brukte halvparten i nye pallekarmar og spara den andre halvparten. Så fylte eg den nederste karmen opp med lauv, tang og tare, litt hestemøkk, planteavfall frå våropprydding i staudebedet og grov kompost frå varmkompostbingen. Den øverste karmen blei fylt med jorda eg hadde grove ut. I slutten av månaden planta eg ut frøsådd løk – salatløk «Red Florence» i karmen. Den var klar i slutte av juni.

«Long Red Florence», dyrka fram frå frø. (Foto: Jan Inge Haga)

Den 15. juli 2018, var all rødløken teken opp. Då gjentok eg prosessen: SJÅ HER:

Dette grov eg ut av ein dobbel pallekarm.

Tok av sjølve karmane, og spadde jordhaugen over i trillebårer og baljar. Sjekk den kopostjorda! Ikkje bare porøs og næringsrik, men full av liv! (makkar, bakteriar, soppsporer osv. som gjer at plantene stortrives).

På plass att med nederste pallekarm og gå i gang og fyll: Med det minst omdanna innhaldet i varmkompostbingen (planteavfall frå kjøkkenhagen), ein halv sekk lauv og ein halv sekk tørt gras.

Innhaldet i varmkompostbingen hamna i den nederste palllekarmen. Det ferskaste avfallet i botnen på karmen.

Det som var mest omdanna, hamna på toppen.

Nederste pallekarm fylt, varmkompostbingen tømd.

På med pallekarm nummer to: Resten av denne øvste karmen fylte eg så med utgraven jord – det i den grå trillebåra og det i baljane.

Dobbel pallekarm full igjen, eit stort trillebårlass til overs.

Her planta eg ut salat: Sidan det var så varmt i juli, hadde eg ikkje sådd sjølv (salat spirer dårlig i varme). Eg kjøpte pluggplantar for 3 kroner stk hos Wiig gartneri på Jæren. (NB! Denne artikkelen er IKKJE sponsa.

Då hadde eg eit stort trillebårlass med god jord til overs. Det toppa eg firkantbedet framføre karmane med, etter at eg hadde teke opp rødbetene som eg planta ut her i mai.

Firkantbedet har fått tjukt toppdekke av kompostjord. Spinat i balje gledar seg..

I juni hadde eg sådd ein balje med New Zealandsk spinat (får tjukkare blad enn vanleg spinat og toler varme mykje betre). Nå blei desse småplantene fordelte i bedet.