Jysla sunn kosemat: Havreform med blåbær og banan

Litt koseleg med regn, men tidlegpotetene ligg langflate i den sterke vinden. Trengte ein kopp te med noko godt… Dessutan var eg svolten, måtte vera noko som heldt meg mett nokre timar. På kjøkkenbenken låg ein brun banan, i kjøleskapet ein halv pose opptinte blåbær.

Dermed vart det “Havreform med blåbær og banan” og eit proteintilskot som kanskje vil overraska deg…

Oppskrift: 

• 1 stor, mogen banan
• 1 kopp blåbær (tinte viss dei har vore frosne)
• 1/2 ss kakao (eg brukar helst råsjokolade)
• 1 kopp havregryn
• 1 kopp svarte bønner (ferdig kokte, slike du kjøper i boks/øskje)
• 1 liten neve rosiner (eller hakka dadlar, eller begge deler, kjem an på kor søtt du vil ha det)
• 2 ss hakka valnøtter
• 1 ss solsikkefrø

Framgangsmåte:

1. Set omnen på 180 grader.
2. Mos bønner og banan.
3. Ha i resten, bland, ha i ei lita form smurd med rapsolje eller kokosolje (evt smør).
4. Legg over eit bakepapir.
5. Steik i omnen i 20-25 minuttar.

Avkjøl litt.

Et med skei, det som blir att, let du bli kaldt. Skjer opp, så har du såkalla “protein bars”.

Nyttige næringsstoff

Dette får du i deg:

Masse protein i bønner. Pluss antioksidantar som det også er mykje av i blåbær, valnøtter og råsjokolade. Sunt fett og protein også i valnøtter og solsikkefrø. Høgkvalitet karbohydratar i havregryn. Fiber i alt. Sunn søting av banan og rosiner.  C-vitamin. Jern, kalk, sink, magnesium.

Ernæringsekspertar tilrår oss å eta bønner, bær, nøtter&frø, frukt og grønsaker kvar dag.

Då kan eg haka av for alt utanom grønsaker. Det blir lett – for det skal eg ha massevis av til middag, nyplukka frå kjøkkenhagen.